Интерактивна мапа

Почетна Зачини го патешествието - Авантури во природа - Забава и возбуда - Здравје и убавина - Истражување на потеклото - Сензационални вкусови Испланирај го патувањето

По патот на духовноста

ЦРКВИ И МАНАСТИРИ

Истражување на потеклото

Археолошки Локалитети Цркви и манастири Села Културни споменици

Цркви и манастири

Гевгелија е позната по своите цркви и манастири богати со фрески и икони кои ја чуваат вековната христијанска традиција на овој крај. Посети ги и дознај повеќе за нив! Секоја црква и манастир дише со својата приказна и е длабоко поврзана со историјата и народниот бит на овој регион!

Црква „Свети Пантелејмон“

Црквата „Свети Пантелејмон“ се наоѓа во селото Хума, сместена на падините на Кожуф Планина во југозападниот дел на општина Гевгелија. Црквата е изградена во XIX век и од оштетувањата на кровната конструкција и таванот, прилично се оштетени и фреските, иконите и внатрешноста на црквата. Мештаните, пред две децении, успеале да ја реновираат и сочуваат камбанеријата и извршат реконструкција на кровот и настрешницата на црквата . Посебно е важно да се нагласи и тоа што се вратени иконите во црквата, кои по напуштањето на селото биле сместени во Музејот во Штип. Познат е и фрескоживописот на црквата кој датира од времето на изградбата во XIX век. Во месец август, секоја година по повод христијанскиот празник „Свети Пантелејмон“, селската црква организира неделен курбан, на кој присуствуваат голем број граѓани од општината и пошироко.

Црква „Свети Ѓеорѓиј“

Црквата „Свети Ѓеорѓиј“ се наоѓа во селото Серменин, сместено на североисточните падини на планината Кожуф, а северозападно од Гевгелија. Црквата е изградена 1834 година, а обновена е кон крајот на XIX век, од страна на градителот Андон Китанов. Последно нејзино обновување е во 1940 година, а фрескоживописот бил нацртан во 1951 година од страна на сликарот Ѓорѓи Хаџи Николов од Гевгелија. Црквата поседува богати фрески и икони, кои датираат од XIX век. Црквата Свети Ѓеорѓиј е една од најсочуваните цркви во регионот.

Црква „Вознесение Христово – Свети Спас“

Црквата „Вознесение Христово – Свети Спас“ се наоѓа во селото Петрово. Изградена е во 1860 година, а веќе наредната година била опожарена.. Повторно е изградена 1867 година од градителот Андон Китанов. Црквата „Свети Спас“ има прекрасен фрескоживопис кој е насликан на северниот и јужниот зид. Иконите се наредени во три дела и сите датираат од периодот на 1863 до 1869 година.

Манастир „Свети Атанасиј“

Манастирот „Свети Атанасиј“ се наоѓал на самиот влез во селото Петрово. Во 1980 година поради старост и неодржување се урнал, а пред извесно време на неговите темели е изградена еднокорабна црква од страна на Васил Марков од село Петрово. Денес претставува црква на мештаните каде што се вршаат црковни обреди.

Црква „Свети Кирил и Методиј“

Црквата „Свети Кирил и Методиј“ се наоѓа во центарот на градот, во близина на шеталиштето, поточно на неговата јужна страна. Црквата е изградена при крајот на XIX век, поточно во 1895 година и е солидно сочувана. Поседува голем број фрески и икони и има извонреден иконостас. Црквата се користи за богослужби, венчавки, крштевки и други црковни обреди, а најмасовно е посетена за Велигденските празници, кога речиси секој граѓанин од градот доаѓа да го одбележи Христовото воскресение.

Црква „Свети Спас“

Црквата „Свети Спас“ се наоѓа во близина на реката Сува Река во југоисточниот дел на градот. Покрај црквата е изграден и конак, па често црквата „Свети Спас“ кај граѓаните се споменува и како манастир. Инаку, црквата е изградена во почетокот на XIX век. До 1912 година истата била повеќепати доградувана. Богата е со фрески, икони и иконостас. Црквата „Свети Спас“ ја посетуваат голем број на христијански православни верници, особено за време на патрониот празник на Гевгелија – Свети Спас, кој што дводневно се одбележува и на кој доаѓаат голем број посетители од околните градови и села.